जळगावात २० हजारांची लाच घेताना दोन पोलिसांना पोलिस ठाण्यातच रंगेहाथ अटक
जळगाव दि- ११/०४/२५, जळगाव शहराच्या मध्यवर्ती भागातील जळगाव शहर पोलीस ठाण्यात लाचलुचपत प्रतिबंधक विभागाच्या पथकाने गुरुवारी रात्री सुमारे १० वाजेच्या सुमारास पुन्हा एकदा धडक कारवाई करत दोन पोलिस हवालदारांना लाच घेताना रंगेहातथ पकडले आहे. पकडण्यात आलेल्या हवालदारांची नावे रवींद्र सोनार आणि धनराज निकुंभ अशी असून, याप्रकरणी दोघांना अटक करण्यात आलेली असून, त्यांच्या विरोधात गुन्हा दाखल करण्यात झालेला आहे.
याबाबत सविस्तर वृत्त असे की, जळगाव शहर पोलीस ठाण्यात दाखल असलेल्या एका तक्रारीच्या अनुषंगाने ४९८ कलमांतील प्रकरणात सदर हवालदारांनी २० हजार रुपयांची लाच मागितली होती. या संदर्भात तक्रार प्राप्त होताच लाचलुचपत प्रतिबंधक विभागाने सापळा रचून ही कारवाई केली आहे.
जळगाव लाचलुचपत प्रतिबंधक विभागाचे पोलीस उपअधीक्षक योगेश ठाकूर यांच्या मार्गदर्शनाखाली एसीबीच्या पथकाने ही धडक कारवाई केली आहे. पोलीस स्टेशनच्या आवारातच ही धडक कारवाई करण्यात आल्याने रात्री पोलीस ठाण्यात एकच खळबळ उडालेली आहे. या कारवाईनंतर लाचलुचपत प्रतिबंधक विभाग, जळगावच्या कार्यप्रणालीचे सर्वत्र कौतुक होत आहे. पोलीस दलातील भ्रष्टाचाराविरोधात अशा प्रकारच्या कारवायांमुळे जनतेमध्ये विश्वास वाढीस लागणार असल्याचे बोलले जात आहे. सदरील कारवाई ही लाचलुचपत प्रतिबंधक विभागाच्या नाशिक विभागीय पोलिस अधिक्षक शर्मिष्ठा घारगे यांच्या मार्गदर्शनाखाली पोलिस उप अधीक्षक योगेश ठाकूर व त्यांच्या पथकाने केलेली आहे.
